واحشني يابا.. الجمعه الأخيره شعر حزين عن فراق الأب
(الجمعه الاخيره)
ابويا عاش العمر كله شايل ...ولما احتاجني اشيل شيلت.
بس الشيله كانت تقيله المرادي...
كتفي شايل نعش ابويا وكتف اخويا شايل قصادي.
اتمنيت ساعتها يكون النعش فاضي.
خلاص يا طيب ماشي وسايب سمعه وسيره ....طيب كنت قول ان دي الجمعه الاخيره.
عارف يابا الحياه من غيرك هتكون ولا ليها معني...نتقابل في الجنه هناك هو في احسن من دا مكان يجمعنا.
اجمد يا كتفي اوعاك تميل....لسه قدامك شيله وحمل تقيل.
فاكر يابا لما قريت سوره الملك (تبارك)وفضلت تبكي....لاجل حظك الطيب ابواب السما تفتح والدنيا تشتي....وامي كانت ماسكه القرأن ومعاك بتقرأ.....قد ايه امي حماله اسيه وست صابره...بس غصب عنها كانت بتبكي.
فاكر يابا لما قولت انك هتموت يوم جمعه....وان ستي جتلك وجيبالك لبن ابيض مشوفتش ابيض منه.....وانك حجيت الحجه الكبيره......ياريتني فهمت قبل ما اسافر ان دي الجمعه الاخيره.
مش كان نفسك تفرح بيا تشوفني عريس......مش كنا بنتجمع يوم جمعه ليه غيرت ميعادك وخليت اللمه يوم الخميس.
كل قرابك وحبايبك بيجولك كل خميس قدام قبرك وبيدعولك.
ياااارب صبر ........كلها ايام معدوده ويجمعنا قبر.
وصيتي يدفنوني جنبك....عارف ساعتها مش هتقدر تفرد ايدك وتاخدني في حضنك.
يوم ٢٢/١١/٢٠١٩ يوم الصدمه الكبيره.....ابويا مات وكانت
الجمعه المريره.....الجمعه الاخيره.
(واحشني يابا).
