بعد أزمة فيلم ريش.. محمد دياب يرد على تصريحات شريف منير

رد المخرج المصري محمد دياب على تصريحات الفنان شريف منير وأزمة إساءته لمصر التي أثيرت مساء أمس خلال عرضه بالدورة الخامسة لمهرجان الجونة السينمائي؛ بسبب مناقشته لحياة الفقراء وبعض مشكلات الطبقة الكادحة.

وكتب "دياب" عبر حسابه الشخصي بموقع التواصل الاجتماعي "فيس بوك" :" كلام الأستاذ شريف منير ان الجوايز اللي خدها فيلم ريش هي مؤامره من الغرب علي مصر كلام خطير جداً خاصه أنه من فنان كبير".

وأضاف:" هتكلم من خبرتي كشخص عضو لجنه تحكيم في مهرجان كان، و عضو في اكاديميه الاوسكار: قولاً واحداً مفيش انسان لا بالتلميح و لا بالتصريح عمره ما بيحاول يأثر علي اختيارات لجان التحكيم و اللي اعضاءها بيتكونوا من فنانين مميزين من انحاء العالم. اداره اي مهرجان دورها بينتهي بإختيار الافلام المشاركه و نقطه. و يسأل في ذلك الفنانين اللي كانوا اعضاء لجان التحكيم في المهرجانات الثلاثه الكبري زي هند صبري و نيللي كريم و محمد حفظي".

وتابع :"طب ليه الافلام اللي بتروح مهرجانات بتبقي عن الفقرا او عن المشاكل؟ الافلام المستقله في العالم كله هي الافلام اللي خارج منظومه الانتاج التجاريه، يعني الافلام اللي مش لاقيه انتاج و دي بتبقي دايماً الافلام اللي عن المهمشين او الناس اللي ملهاش صوت، و بما انها افلام مش متوقع منها تجيب فلوس فبيبقي عند صناع العمل الجراءه انهم يعملوا اختيارات فنيه جريئه و ده بيخليها مغريه للمهرجانات اللي بتدور علي سينما جديدة ومختلفة".

وأكمل :"سنة 2019 الفيلم اللي كسب البالم دور هو (شوب ليفترز ) الياباني ، و سنه 2020 اللي كسب نفس الجايزه هو (باراسيت) الكوري و بعدها اكتسح الاوسكار. الفيلمين عن العشوائيات في دول عالم اول و بلادهم احتفت بالفيلمين و بصانعيهم بالرغم من ان العشوائيات نسبتها في الدولتين لا تذكر".

وعن رأيه في فيلم "ريش" قال :"المميز في فيلم ريش مش الفقر علي الإطلاق بل اسلوب مخرجه الجرئ و طريقة سرده المختلفة، و سواء عجبك الفيلم او لأ لازم نشيد بإن الفيلم ده فيلم بصوت و طعم مختلف فنياً مش موجود في السينما المصرية. الفقر و المشاكل لا يمكن يدخلوك مهرجان كبير لو مفيش جوده صنع او تجربه سينمائية رائدة، فيلم ريش فيه تجريد للمكان و الزمان، و الفقر فيه خلفيه للقصه لدرجه ان المكان مش شبه مصر و لا أي مكان في العالم".

وأضاف:" ولو الفنانين نفسهم هم اللي بقوا بيرددوا الاتهامات اللي من نوعيه تشويه مصر فدي مصيبه، لأن الكلام ده فيه مزايده علي الرقابة و علي منتجي الفيلم و علي المهرجانات اللي بتختار الافلام و هيخلي اي فيلم عن المهمشين متهم بالتزلف و بيصعب انه ينتج او يُجاز"

وتابع:" و للأسف الكلام ده بيخلي الرأي الشعبي يبقي دايماً حاطط افلام المهرجانات في وضع المتهم: اكيد اختاروا الفيلم عشان سبب غير مستواه الفني. كلام فيه انسحاق و هزيمة و كأننا معندناش القدرة نعمل حاجه كويسه".

وعن رأي شريف منير، قال:"بمنطق استاذ شريف كان هينسحب من عرض الفيلم العظيم الكيت كات اللي كان بطله و قدم فيه دور عظيم و كنا اتحرمنا من اعظم فيلم مصري."

واختتم دياب حديثه مشيدًا بالمخرج عمر الزهيري، حيث قال:"عمر الزهيري مخرج مصري واعد ويستحق مننا كلنا التحية والتشجيع، وفيلم ريش مدحه وذمه لازم يكون في داخل الاطار الفني فقط".