بعد موقف عامل النظافة.. ويجز يثير الجدل على ”السوشيال ميديا” وأحمد العوضي يرد
أثار مطرب الراب ويجز، جدلا كبيرا بسبب منشور له عبر حسابه على موقع الصور إنستجرام، هاجم فيه الفنان أحمد العوضي بعد دعوة الأخير لعامل النظافة الذي تم طرده من إحدى محلات الكشري لتناول العشاء برفقته.
وكتب ويجز عبر “انستجرام”:"لما تعمل حاجة كويسة لحد متبقاش مرائي وتتاجر بقد إيه أنت بتحب تعمل خير، اعمل وارمي البحر.. وبدل ما تاخد نصيبك من الشكر من الناس ربنا يكرمك من فضله.. بقينا في حاجة في منتهى الصورني، وأنا بعمل خير".
الجمهور فسر منشور ويجز على أنه يقصد به أحمد العوضي والذي جاهر بموقفه الإنساني الخير مع عامل النظافة ووفر له وظيفة سائق نقل، لكن ويجز كتب منشورا آخر أعلن فيه أنه لا يقصد أحد بعينه وقال فيه:" أهي دي المشكلة اللي مش بتكلم في حاجة بسببها، أنا مش صاحي عايز أعدل على حد بعينه، ونيتي سليمة".
أحمد العوضي يرد
من جانبه رد أحمد العوضي في منشور له عبر حسابه على إنستجرام قال فيه: أنا بس طالع اتكلم معاكم علي موقف امبارح الناس اللي بتقول انه دا شو واني صورت الراجل والكلام ده، بالبلدي كدا لو أخوك عنده مشكلة في الشارع أنت بتجيب حقه قدام الناس في المكان اللي اتعمل عليه نمرة فيه مش بتاخده علي جنب وبتجيب له حقه … اللي بينك وبين ربنا الصدقة أنا مورتكش اديته كام ولا عملت له إيه أنا جبرت بخاطره، لأن مَن صار بين الناس جابرًا للخواطر أدركه الله في جوف المخاطر".
التفتيش في النوايا
وأضاف العوضي:" "الراجل اتكسر قدام الناس، فحقه أطلعه منصور قدام الناس برضو، ده من حقي ودوري لو ربنا مديني شُهرة أني استخدمها ربنا إداني الشهرة لسبب وبستخدمها في السبب اللي يرضي ربنا، ودي حاجة بيني وبين ربنا، أوعى تفتش في النوايا أنت مش قاضي في الأرض".
وتابع: "كل الموضوع أني نزلت بوست لا صورته ولا حاجة لأن أنا راجل ابن شارع، أنا قاعد في الشارع طول عمري، وهفضل في الشارع وهفضل أراضي في خلق الله دي حاجة بيني وبين ربنا".
وأضاف:" "لما قابلت الراجل، قُلت له هناكل أنا وأنت في طبق واحد، لأن كلنا واحد وولاد تسعة أنا مبسطها الدنيا مش كلها اللي أنت شوفته.. أنت أخويا وكلنا ولاد آدم، واللي عملته مش مقصود بيه شو ولا أي حاجة.. اللي أسعد الراجل أنه حس أنه منصور ولقى شغل".
واستطرد: "يا عم قلدني دي حاجة كبيرة أنك تفتح له باب رزق، وأنا ربنا جعلني سبب لوظيفته الجديدة، أنا مش ناقص شهرة، بس بصدر لك حاجة كويسة لو عايز تقلدني قلدني أنك تجبر خاطر الناس، وربنا يقدرنا على فعل الخير".
